ಹಸಿರು ಲಂಗದ ಹುಡುಗಿ

ಹಸಿರು ಲಂಗದ ಹುಡುಗಿ

ಓರೆ ಬೈತಲೆ ತೆಗೆದು

ಮುಂಗುರುಳ ಸುತ್ತಿಟ್ಟು

ನಗೆ ಚೆಲ್ಲುತಾಳೆ..

ಸುರಗಿ ಸಂಪಿಗೆ ಜಾಜಿ

ಮಲ್ಲಿಗೆ ಮಂದಾರ

ಸುರಿದು ಮಾಲೆಯ ಕಟ್ಟಿ

ಘಮ್ಮೆನ್ನುತಾಳೆ..

ಅಗಲ ಹಣೆ ನಡುವೆ

ಚುಕ್ಕಿ ಬೊಟ್ಟನು ಇಟ್ಟು

ಆಗಾಗ ತಿರುಗಿ

ಹುಬ್ಬೆತ್ತುತಾಳೆ..

ಕಪ್ಪು ಕಾಡಿಗೆ ಹಚ್ಚಿ

ಬೆರಗು ನೋಟ ಚೆಲ್ಲಿ

ಕಣ್ಣ ಬಾಣ ನೆಟ್ಟು

ಗುರಿ ಹೂಡುತಾಳೆ..

ಹೊಳೆವ ಬಳೆ ಕಾಲ್ಗೆಜ್ಜೆ

ಚೋಟುದ್ದ ಕಿವಿಯೋಲೆ

ಎಳೆ ಸರವ ತೊಟ್ಟು

ಘಲ್ಲೆನ್ನುತಾಳೆ..

ತುಂಬು ಹರೆಯದ ಬಾಲೆ

ಎಳಿತಾಳೆ ಸೆಳಿತಾಳೆ

ಆಗಾಗ ಬಂದು

ಎದೆ ತುಳಿಯುತಾಳೆ..

ಇಂತಿಷ್ಟು ಕಾರಣವೋ

ಇನ್ನೆಷ್ಟು ಕಾರಣವೋ

ಹಸಿರು ಲಂಗದ ಹುಡುಗಿ

ಮನ ಕದಿಯುತಾಳೆ

ಮಾತೇ ಮರೆಯುತಿದೆ

ಎದೆ ಜೋರು ಬಡಿಯುತಿದೆ

ಹೋಗಿ ಹೇಳಿದರೀಗ

ಏನೆನ್ನುತಾಳೆ..?

- ಅನಾಸ್ಕ